Канадската поп-ѕвезда The Weeknd стана првиот изведувач што достигна 100 милиони месечни слушања на „Спотифај“.Се наведува дека никој друг не е ни блиску до неговиот успех на стриминг.
33-годишниот музичар постави два светски рекорда – тој е пејачот што има најмногу месечни слушатели на „Спотифај“ и првиот уметник што некогаш дошол до 100 милиони слушатели месечно на гигантот за стриминг на музика.
Песната “Blinding Lights” на The Weeknd од 2020 година е најстримуваната песна на „Спотифај“ на сите времиња, со повеќе од 3,47 милијарди стримови, пренесува „Си-би-ес њуз“.
Музичарот објави спот за оваа песна на почетокот на 2020 година, а досега е прегледан повеќе од 691 милион пати на YouTube. Само два месеца по објавувањето на песната, таа се најде во топ-100 песни на листата „Билборд“. Неговата песна “Starboy” е исто така една од најслушаните песни на сите времиња на „Спотифај“.
Мајли Сајрус е неговата најголема конкуренција со 82,4 милиони месечни слушатели, а потоа следат Шакира (81,6 милиони), Аријана Гранде (80,6 милиони), Тејлор Свифт (80,2 милиони) и Ријана (78,5 милиони).
Мрежата TikTok најмногу придонесе за растот на неговата популарност, откако ремиксот на неговиот дует со Аријана Гранде „Die for You“ стана вирален на таа платформа, пренесува CNN.
makstar.net 