Николовски ги презентираше мерките за лозарите 2024

Министерот за земјоделство, шумарство и водостопанство, Љупчо Николовски пред лозарите на денешната средба во Кавадарци, ги претстави новите мерки предвидени за поддршка на секој еден земјоделец за оваа 2024 година.

“Традиционално и оваа година до празникот Св.Трифун лозарите ќе ги добијат дополнителните субвенции, или 28.000 денари. Покрај овие средства исплатени ќе бидат и 12.000 денари по хектар дополнителна поддршка за претрпени штети по лозовите насади, до секој лозар и за винско и трпезно грозје. Вкупна дополнителна поддршка од 40.000 денари, по хектар, што лозарите може да ја очекуваат на своите сметки до Св.Трифун.

Нашата искрена грижа за овие два важни сектори ја потврдуваме и со подготвениот нов закон за вино. Закон што на лозарите конечно им дава гарантирана откупна цена на винското грозје. Закон кои го отцртува идниот развој на овие важни сектори и предвидува нова посебна програма за поддршка.

Како што ветивме, од оваа година поддршката за мерката зелена нафта ја зголемуваме на 100%, за сите земјоделци. Лозарите сега добиваат 9.600 денари по хектар поддршка за зелена нафта.

Оваа 2024 година, со нови мерки до поголема поддршка на лозарите и за остварено производство на грозје. 60.000 денари по хектар, вкупна поддршка, за семејни земјоделски стопанства, кои го произвеле и продале винското грозје, врз основа на склучен договор со регистриран производител на вино, најдоцна до 30 април 2024 година, со принос од најмногу 10.000 килограми по хектар и исплатена цена по килограм не пониска од 35 денари. Од кои, 12.000 денари авансно и 48.000 денари дополнителна поддршка.

Поддршка за лозарите, преку програмата за рурален развој, обезбедуваме во зачувување на нашата македонска автохтона винска лоза Станушина, во висина од 5.000 денари, по хектар.

На денешната средба со лозарите во Кавадарци реков дека за мене нема ништо поубаво и ништо подобро од тоа што можам секој да го погледнам во очи, гордо и без срам да кажам дека дадениот збор сум го одржал.